“Дар соли 2024 фурудгоҳҳои байналмилалии кишвар ҳамагӣ ба 3 – млн 362 ҳазор мусофир хизмат расонидаанд, ки ин нисбат ба соли гузашта 316 ҳазору 500 мусофир ё 8,6% кам мебошад” – дар ин бора зимни нишасти матбуотии Агентии авиатсияи граждании назди Ҳукумати Ҷумҳурии Тоҷикистон гуфта шуд.

Ҳамзамон, зикр шуд, ки дар давраи ҳосботӣ парвозҳои мунтазам дар хатсайри Душанбе – Боку, Хуҷанд- Урумчӣ, Душанбе-Давҳа ва Душанбе -Тифлис ба роҳ монда шудаанд. Дар ин баробар дар фурудгоҳҳои байналмилалии кишвар 11 ҳазору 737 хатсайр анҷом дода шуд, ки ин нисбат ба соли гузашта 501 хатсайр ё 4% кам мебошад.

Зикр шуд, ки давоми соли 2025 роҳандозии парвозҳо бо Ҷумҳуриҳои Кипр, Кореяи Ҷанубӣ, Маҷористон , Британияи Кабир ва Ирландияи Шимолӣ амалӣ мегардад ва дар назар аст, ифтитоҳи хатсайри нави ҳавоӣ миёни Душанбе-Киш-Душанбе роҳандозӣ гардад, ки он дар соҳаи ҳавонавардӣ ва сайёҳии Тоҷикистон рӯйдоди муҳим дониста шуда, ба рушди соҳаи сайёҳӣ ва тақвияти ҳамкорӣ мусоидат хоҳад кард.

А. Ҳасанов