Таърихи куҳан ва мероси бойи фарҳангӣ, табиати нодир ва мавзеъҳои биҳиштосои Тоҷикистон заминаҳои мусоиди рушди соҳаи сайёҳӣ ба ҳисоб рафта, соҳаи мазкур ба сифати яке аз самтҳои боэътимоди рушди иқтисодиёти миллӣ арзёбӣ мегардад.
Аз ин лиҳоз, соҳаи сайёҳӣ ҳамчун воситаи собитшудаи ҷалби сармоягузории дохилию хориҷӣ, соҳаи таъсисдиҳандаи ҷойҳои нави корӣ, манбаи даромади аҳолӣ ва ғанигардонии буҷети давлатӣ дар рушди иқтисодию иҷтимоӣ саҳми назарас дорад.
Бо дарназардошти ин омилҳо ва бо мақсади рушд намудани вазъи иҷтимоию иқтисодии минтақаҳои кишвар бо ибтикор ва сиёсати созанда ва бунёдкоронаи Пешвои миллат, Президенти Ҷумҳурии Тоҷикистон муҳтарм Эмомали Раҳмон соҳаи сайёҳӣ пайваста рушд ёфта, Ҷумҳурии Тоҷикистон дар ин самти муҳими стратегӣ ба пешравиҳои назаррас ноил гардидааст.
Ҳукумати мамлакат барои таъмини шароити хуб ҷиҳати сармоягузории дохилию хориҷӣ имтиёзҳои зиёд роҳандозӣ намуда, дар марҳилаи аввал барои обод намудани маконҳои ҷаҳонгардӣ ва таъсиси инфрасохтори зарурии сайёҳӣ заминаҳои иқтисодӣ ва ҳуқуқӣ фароҳам овард. Тибки қарори ҳукмати мамлакат воридоти техникаю таҷҳизот ва масолеҳи сохтмонӣ ҷиҳати бунёди иншооти инфрасохтори сайёҳӣ аз андоз аз арзиши иловашуда ва боҷи гумрукӣ озод карда шуда, боҷи гумрукӣ барои воридоти автомашинаҳои нав бо мақсади сайёҳӣ 50 фоиз кам карда шудааст.
Фароҳам овардани имтиёзи андозию гумрукӣ ҳавасмандии соҳибкоронро зиёд намуда, танҳо дар асоси ин имтиёзҳо солҳои охир даҳҳо лоиҳаи инфрасохтории сайёҳӣ дар самтҳои бунёди маҷмааҳои сайёҳӣ, боғҳои фарҳангию фароғатӣ, меҳмонхонаву осоишгоҳи замонавӣ ва дигар иншооти сайёҳӣ идома доранд. Тибқи ҳадафҳои “Стратегияи миллии рушд дар Ҷумҳурии Тоҷикистон барои давраи то соли 2030” муаррифии мероси бойи таърихию фарҳангии Тоҷикистон, табиати нотакрор, кӯлҳои рангоранг, ҳайвоноту растаниҳои нодир боҳадафи рушди сайёҳӣ омили муҳим рушд ва афзоиши ҳиссаи соҳаи мазкур дар маҷмуи маҳсулотӣ мамлакат арзёби мегардад. Тибқи санадҳои қабулгардида ҷиҳати боз ҳам беҳтар намудани фазои сармоягузорӣ ва ҳавасмандгардонии соҳибкорони ватани ширкатҳои сайёҳӣ ва роҳбаладон мустақил низ дар тӯли панҷ соли аввали фаъолият аз андоз аз фоида, озод карда шудаанд. Ҳоло дар мамлакат тибки омор 245 ширкати сайёҳи фаъолият менамояд, ки аз ин сабукиҳо бархурдоранд.
Ҳамаи ин сабукиҳои фарҳамовардаи давлату ҳукумат ба субъектҳои соҳаи сайёҳӣ нишонаи тавваччуҳи махсус буда, баҳри рушди ин соҳа равона гардидааст. Ширкатҳои сайёҳиро зарур меояд, ки ҷиҳати боз ҳам корро ҷоннок кардан ва муаррифии хуби имконоту зарфиятҳои кишвар талош варзанд ва сайёҳонро ба Тоҷикистони офтобӣ бештар ҷалб намоянд.
А. Ҳасанов
