“Дар вилояти Суғд ба рушди соҳаи сайëҳӣ  таваҷҷуҳи зарурӣ равона гардида, бо маблағгузории Бонки осиёии рушд оид ба таҳияи “Нақшаи генералии сайёҳии ҳамгироишудаи вилояти Суғд” ба маблағи зиёда аз 1,0 млн. доллари ИМА бо Ширкати машваратии Киос ба имзо расида, рӯйхати 25 лоиҳаи сармоягузорӣ оид ба рушди инфрасохтори соҳаи сайёҳӣ дар вилояти Суғд омода шудаанд” – ин нуктаро зимни нишасти хабарӣ раиси вилояти Суғд зикр намуд. 

Барои хизматрасонӣ ба сайёҳони дохилию хориҷӣ дар вилоят 1 фурудгоҳи байналмилалии Хуҷанд, 6 гузаргоҳҳои сарҳадии байналмилалӣ, 95 субъекти хизматрасонии сайёҳӣ, аз ҷумла 62 меҳмонхона, 18 осоишгоҳ, 2 маркази муолиҷавӣ, 4 дармонгоҳи табобатӣ-истироҳатӣ, 2 хонаи истироҳатӣ, 4 лагер, 1 базаи истироҳатӣ ва 1 базаи сайёҳӣ бо ғунҷоиши умумии 7441 ҷой фаъолият доранд.

Гуфта шуд, ки айни ҳол дар шаҳру ноҳияҳои вилоят 48 ташкилоти сайёҳӣ  фаъолият мебаранд.  Соли сипаришуда ба мақсадҳои гуногун ва аз он ҷумла бо мақсади сайёҳӣ ба вилоят зиёда аз 1 млн. нафар шаҳрвандони хориҷӣ ташриф оварданд, ки нисбати соли пешин 134,2 фоиз зиёд мебошад.

А. Ҳасанов