Дар ноҳияи Ёвон  бо мақсади рушди ҳунарҳои миллӣ, омода намудани духтарон ба ҳаёти мустақилона  ва арҷгузорӣ ба анъанаҳои неки ниёгон бо ташаббуси  мақомоти иҷроияи ҳокимияти давлатии ноҳия, бахши кор бо ҷавонон ва варзиш, шуъбаи  кор бо занон ва оилаи ноҳия озмуни ноҳиявӣ зери унвони «Мактаби Модар» миёни ҷавондухтарон дар тарабхонаи “Ориён”-и ноҳия баргузор карда шуд. 

Роҳандозии озмуни мазкур  ҷиҳати  муаррифии ҳунари волои ниёгон ва ҷалби ҷавондухтарон ба касбу ҳунар, сайқал додани маҳорати пазандагиву ҳунарҳои мардумӣ ва дар умум омодасозии онҳо ба ҳаёти мустақилона  мусоидати фаъол мекунад.

Нахуст, меҳмонон аз намоишгоҳи  ҳунармандону  кадбонуҳои  хусалиқаи  ҳудуди  ҷамоатҳои  шаҳраку деҳоти ноҳия, ки аз  ҳунарҳои мардумӣ ва таомҳои миллӣ мураттаб гардида  буд, боздид  намуда, ба  ҳунару  ҳунармандии онҳо  баҳои муносиб доданд. Дар ин чорабинӣ  дар баробари  бонувони  ҳунарманди  ҷамоатҳои шаҳраку  деҳот, ҳамчунин хонандагони синфҳои  болоии муассисаҳои таълимӣ ва касбомӯзони коллеҷу литсейҳои касбӣ техникии ноҳия иштироки фаъолона  доштанд.

Ҳамзамон, дар чорабинии мазкур намоиши либосҳои миллӣ, ки ҷузъи ҷудонашавандаи фарҳанги миллӣ мебошад, ба дидгоҳи  назари иштирокдорон гузошта шуда, бозгӯ  аз  завқи баланди  зебоипарастӣ ва ҳунармандии  бонувону  гулдухтарони ноҳия мекард.

Лозим ба  зикр аст,  ки ташкил ва гузаронидани чунин  озмуну  чорабиниҳо  бо ҷалби  васеи бонувон  аз манфиат  орӣ набуда, натанҳо дар рушди  ҳунарҳои мардумӣ, эҳёи анъанаҳои  неки ниёгон  мусоидат мекунад, балки дар соҳибкасбу  соҳибҳунар гаштани  духтарон   заминаи мусоид  фароҳам меорад.

А. Ҳасанов