Шоми 21- уми март Маҷмааи Майдони “Истиқлоли”-и шаҳри Душанбе ба фарқ аз рӯзҳои дигар фазои комилан идона дошт. Зеро дар доираи тантанаҳои ҷашнӣ ба ифтихори Наврӯзи бостонӣ дар ин макон чорабинии фарҳангию фароғатӣ баргузор гардид.

Дар қисмати расмии ҳамоиши идона муовини раиси шаҳри Душанбе суханронӣ намуда, иброз дошт, ки Наврӯз аз ҷумлаи бузургтарин ва маҳбубтарин ҷашнҳои тоҷикон мебошад, ки аз даврони қадим ҳамчун мероси пурарзиши ниёгон то ин замон расидааст.

Макони баргузории чорабинӣ бо шиорҳо дар васфи Наврӯз ва рамзи хоси Наврӯзи байналмилалӣ оро ёфта, сокинону сайёҳон дар фазои базму тараб хушҳолӣ намуданд.

Мақсади асосии таҷлили бошукӯҳу ҳадафманди Наврӯз дар соли равон гиромидошти шоистаи муқаддасот, суннату анъана ва фарҳангу тамаддуни бостонӣ ва муосири миллати тоҷик мебошад.

Ҳунармандону ҳаваскорон бо танини суруду таронаҳои дилнишин тавонистанд бори дигар фарҳанги оламшумули миллати тоҷикро бо нишон додани намунаи сару либос ва рақсҳои ҷаззоб ба ҷаҳониён ба таври шоиста муаррифӣ намоянд.

Дар шакли нав ва пурмуҳтаво баргузор кардани ин чорабинии идона дар пойтахти кишвар – шаҳри Душанбе ба мардум ва меҳмонони ин ҳамоиши наврӯзӣ шодиву нишоти беандоза ва таасуроти нек бахшид.

Бояд ёдовар шуд, ки заминаи асосии ин ҳама нусрату шодмониҳо дар ҳамоишҳои ҷашни Наврӯз пеш аз ҳама сулҳу суботи комил ва ваҳдати миллӣ дар саросари кишвар мебошад, ки мардуми сарбаланди тоҷик давоми 33 сол аст, ки аз ин неъмати бебаҳо баҳраваранд. Барномаи бошукуҳи фарҳангӣ бо оташфаввораҳои рангин ҳусни анҷом ёфт.

А. Ҳасанов