Ба ифтихори таҷлил аз рӯзи пойтахти Ҷумҳурии Тоҷикистон-шаҳри Душанбе дар маркази “ЭКСПО”-и пойтахт намоиши  молу маҳсулоти корхонаҳои саноатӣ ва озмуни “Беҳтарин корхонаи саноатии шаҳри Душанбе” баргузор гардид. 

Дар намоишгоҳи молу маҳсулоти корхонаҳои саноатии шаҳри Душанбе беш аз 30 корхонаи истеҳсолӣ дастовардҳои наву муосири худро ба намоиш гузоштанд. Намоишгоҳ дар се бинои барҳавои марказ ташкил гардида, корхонаҳои саноати дар гӯшаҳои алоҳида маҳсулоти истеҳсолнамудаи худро пешкаш намуданд. Дар идома, намояндагони МИҲД-и шаҳри Душанбе  Вазорати саноат ва технологияҳои нав, соҳибкорон, донишҷӯён ва сокинони пойтахт аз гӯшаҳои ташкилгардида шинос шуданд.

Тавре масъулини корхонахо иброз намуданд, ташкили чунин намоишҳо ба ҳавасмандгардонии истеҳсолкунандагони маҳаллӣ ва тарғиби маҳсулоти ватанӣ мусоидат менамояд.

Дар намоишгоҳи молу маҳсулоти корхонаҳои саноатии шаҳри Душанбе соҳаҳои саноати мошинсозӣ, кимиё, нассоҷӣ, маъдан, канданиҳои фоиданок, масолеҳи сохтмон, ангишт, технологияи иттилоотӣ, энергетика, хӯрокворӣ ва кишоварзӣ маҳсулоти ватаниро ба маъраз гузоштанд.

 Мақсади асосии намоиши маҳсулоти корхонаҳои саноатии шаҳри Душанбе  тавсеаи ҳамкориҳо байни истеҳсолкунандагон, ҷалби сармоягузорони дохилӣ ва хориҷӣ ва баланд бардоштани рақобатпазирии маҳсулоти ватанӣ дар бозорҳои хориҷӣ арзёбӣ мегардад.

А. Ҳасанов