Сада яке аз ҷашнҳои мавсимию маросимии мардуми ориёитабор, аз ҷумла ниёгони тоҷикон буда, чун рамзи омодагӣ ба кишту кори баҳорӣ ва муждаи Наврӯз пазироӣ мегардад. Дар Боғи фарҳангию фароғатии ба номи Абулқосим Фирдавсии шаҳри Душанбе ин ҷашни пуршукуҳи ниёгон, нишоне аз фарҳанг ва такягоҳу пуштибони таърихи дури тоҷикон  – Сада   ва намоиши тухмии зироати кишоварзӣ  бо шаҳомати хосса таҷлил гардид.

Дар ин рӯз майдони баргузории ҷашнгоҳ макони базму тараб, шодию нишот ва  муаррифии дастовардҳои кишоварзону ҳунармандонро мемонд.

Дар даромадгоҳи ҷашнгоҳ гулхан, ки рамзи ин ид аст, афрӯхта шуда, дар атрофи  он сокинон ва меҳмонони пойтахт рақсида, таронахонӣ ва шодмонӣ менамуданд.

Фазои боғ идона оро ёфта, дар ҳар гӯшаи он кишоварзон аз минтақаҳои гуногуни мамлакат маҳсули дастранҷи худ аз қабили  тухмии зироат, хӯрокҳои миллӣ, гулу буттаҳои ороиширо   пешниҳоди сокинон гардониданд.

Дар базмгоҳи ҷашни бостонии Сада дар радифи намоиши ниҳолу зироати кишоварзӣ, ҳунарҳои мардумӣ ва дигар маҳсулоте, ки ифодагари ин ҷашн аст, бо иқдоми Кумитаи рушди сайёҳии назди Ҳукумати ҷумҳурӣ гӯшаи имконоти сайёҳии мамлакат пешниҳоди иштирокдорони тантанаҳои идона гардонида шуд.

Дар идомаи тантанаҳои ҷашни такид  шуд, ки 6 декабри соли 2023 зимни иҷлосияи 18-уми Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО номинаи муштараки Ҷумҳурии Тоҷикистон ва Ҷумҳурии Исломии Эрон «Ҷашни Сада» ба Феҳристи мероси ғайримоддии башарият ворид гардида,  бори дигар мақом ва мартабаи худро миёна дигар ҷашнҳо мустаҳкам намуда, ҷаҳониёнро бо таърихи бою рангини миллати тоҷик ошно месозад.

Дар анҷоми ҳамоиши идона ба деҳқонон ва  фаъолони соҳаи кишоварзии вилоят ва шаҳру ноҳияҳо барои иштироки фаъолона дар ташкилу баргузории ҷашни Сада диплом  ва туҳфаҳои хотиравӣ тақдим карда гардид.

Бо пешниҳоди барномаи консертии аҳли фарҳанг тантанаҳои ҷашни Сада дар боғи фарҳангию фароғатии ба номи Абулқосим Фирдавсӣ  хотима ёфт.

А. Ҳасанов