Дар заминаи тақвият бахшидани ободониву бунёдкориҳо ба муносибати истиқболи сазовор аз ҷашни 35-солагии Истиқлолияти давлатӣ  дар ноҳияи Муъминобод бо ташаббуси мақомоти иҷроияи ҳокимияти давлатӣ дар асоси нақшачорабиниҳои таҳиягардида тадбирҳои сабзу хуррамгардонӣ мунтазам амалӣ карда мешавад. Дар доираи амалисозии чунин ҳадафҳои созанда ва баҳри ободу зебогардонии кӯчаву маҳаллаҳо ин навбат дар маркази ноҳия дар ҳудуди ҷамоати шаҳраки Чорсу бо иштироки кормандони муассисаҳо ва сокинони маҳаллӣ ҳашари дастаҷамъонаи ниҳолшинонӣ баргузор карда шуд.

Тибқи маълумотҳо барои ободониву сабзу хуррамгардонӣ дар мавсими имсола шинонидани 15-ҳазор бех ниҳолони гуногуни ороишиву ҳамешасабз ва сояафкан дар ноҳия нақшагузорӣ гардида, корҳо дар ин самт бо вусъат ҷараён дорад.

Бо мақсади иҷрои ин ҳадафҳо танҳо дар ҷамоати шаҳраки ноҳия,  махсусан шафати роҳҳои автомобилгард, атрофи корхонаву муассисаҳо ва хонаҳои истиқоматӣ шинонидани беш аз 2000 бех ниҳолони ҳамешасабзу ороишӣ ба нақша гирифта шуда, то имрӯз зиёда аз 800 бех ниҳолон шинонида шуданд ва идомаи он марҳила ба марҳила амалӣ гашта истодааст.

Бо вусъат бахшидани чунин тадбирҳои дастҷамъонаи ниҳолшинонӣ зебогиву таровати кучаву маҳал ва мавзеи муассисаҳои фароғатӣ боз ҳам дучанд гардида, барои меҳмонону сайёҳон ва сокинони ноҳия шароити беҳтару хубтари сайру фароғат фароҳам мегардад.

А. Ҳасанов