Дар давоми ҳафта (аз 03 то 08.02.2025) дар як қатор ниҳодҳодҳои давлатӣ ва муассисаҳои олии мамлакат масъулин аз фаъолияти яксолаашон натиҷагирӣ намуданд. Зимни нишастҳои матбуотие, ки ҳар рӯзи корӣ аз ҷониби якчанд вазорату идора баргузор гардиданд, намояндагони воситаҳои ахбори омма имкон пайдо кардан ба саволу пурсишҳояшон ҷавоб гиранд.
Кумитаи меъморӣ ва сохтмон
Тибқи нақшаи тасдиқгаридда оғози ҳафта бо баргузории нишасти матбуотии Кумитаи меъморӣ ва сохтмон шуруъ гардид. Сол то сол афзоиш ёфтани нархи хона дар пойтахт аз масъалаҳое буд, ки зимни нишаст матраҳ гардид.
Вобаста ба ин гуфта шуд, ки имрӯз дар Тоҷикистон нархи 1 метри мураббаи хона ба ҳисоби миёна 705 доллари ИМА-ро ташкил медиҳад. Дар шаҳри Душанбе он 780 доллар буда, вобаста ба ошёна ва мавқеи ҷойгиршавии ин ё он иншоот тағйирёбанда аст.
Кумита оид ба таҳсилоти ибтидоӣ ва миёнаи касбӣ
Роҳабрияти Кумита оид ба таҳсилоти ибтидоӣ ва миёнаи касбӣ зимни баргузории нишасти матбуотӣ дар соли 2024 аз ҷалби 12 ҳазор шаҳрванд аз рӯйи 50 касбу ҳунар ба касбомӯзӣ дар муассисаҳои таълимии таҳсилоти ибтидоии касбӣ ба рузноманигорон иттилоъ дод. Ҳамзамон, номбурда дар идома гуфт, ки бо вуҷуди гузаронидани ташвиқот дар бозорҳо, фурудгоҳҳо, марказҳои савдо, ҳанӯз ҳам шаҳрвандон ба омӯхтани касб таваҷҷуҳ надоранд, ки мо ҷиҳати соҳибкасб гардонидани онҳо корбарӣ намуда истодаем.
Донишгоҳи байналмилалии сайёҳӣ ва соҳибкории Тоҷикистон
Оғози корҳои сохтмонӣ дар маҷмааи биноҳои нави таълимии Донишгоҳи байналмилалии Данғара яке аз дастовардҳои муҳими Донишгоҳи байналмилалии сайёҳӣ ва соҳибкории Тоҷикистон дар соли 2024, зимни нишасти матбуотии ин муассисаи олии мамлкат гуфта шуд.
Омода намудани мутахассисони соҳаи сайёҳӣ дар самти меҳмонхонадорӣ, тарабхонадорӣ ва роҳбаладӣ ҷузъе аз фаъолияти таълимии донишгоҳро ташкил медиҳад. Вобаста ба ин гуфта шуд, ки дар ин давра пойгоҳи моддӣ-техникии озмоишгоҳҳои донишгоҳ бо таҷҳизоти муосири техникӣ таъмин гардида, беш аз 120 донишҷӯ ба даври ройгони омӯзиши «Фарҳанги дастархондорӣ» фаро гирифта шуд. Ин донишҷӯён ба чорабиниҳои гуногуни сатҳи ҷумҳуриявӣ ва байналмилалӣ ба ҳайси хизматрасон ҷалб мегарданд.
Академияи миллии илмҳои Тоҷикистон
Олимони Академияи миллии илмҳои Тоҷикистон дар давраи ҳисоботӣ 30 патент барои ихтироъ ба даст оварданд. Дар ин хусус зимни нишасти матбуотӣ президенти Академияи миллии илмҳои Тоҷикистон иттилоъ дод.
Барои истифодаи амалӣ дар истеҳсолот беш аз 40 коркарди илмӣ ва пешниҳоди олимони академия ва 7 пешниҳод оид ба вазъи иқтисодию иҷтимоии ҷумҳурӣ манзур карда шуд.
МИҲД-и ноҳияи И. Сомонӣ
Масъулини Мақомоти иҷроияи ҳокимияти давлатии ноҳияи И. Сомонии пойтахт дар соли 2024 вобаста ба рушди ҳунарҳои мардумӣ ва ба касбомӯзӣ ҷалб намудани шаҳрвандон тадбирҳои мушаххсаро амалӣ намуда, дар ин давра 626 нафарро ба курсҳои касбомӯзӣ ҷалб намдуаанд.
То имрӯз дар ноҳия 14 маркази ҳунарҳои мардумӣ фаъолият менамоянд, ки дар 12 тои онҳо мунтазам ба сокинон ҳунарҳои мардумӣ ва касбҳои мувофиқ ба бозорри меҳнат омӯзонида мешавад.
Ҳамзамон гуфта шуд, ки дар ноҳия 10 боғи фарҳангию фароғатӣ ва 5 гулгашт ҷойгир аст, ки баҳри истироҳати сокинону сайёҳон дар ҳудуди онҳо мунтазам корҳои ободонию сабзкорӣ гузаронида мешавад.
Нақшаи ташкил ва гузаронидани нишастҳои матбуотӣ аз ҷониби Дастгоҳи иҷроияи Президенти Ҷумҳурии Тоҷикистон тасдиқ шуда, тибқи он нишастҳои матбуотӣ 27 январ оғоз шуда, 14 феврал ба анҷом мерасанд.
А. Ҳасанов
