Баҳри ҳавасмандии наслҳои имрӯзу ояндаи кишвар ба омӯзиши илмҳои муосир ва ҳифзи фарҳангу тамаддуни аҷдодӣ дар ноҳияи Мир Саид Алии Ҳамадонӣ ба муносибати арҷгузорӣ ба шахсият ва мероси гаронмояи олим, мутафаккири тоҷик адиб ва донишманди сатҳи ҷаҳонӣ дар илми тиб, Абӯалӣ Ибни Сино бо иштироки намояндагони мақомоти иҷроияи ҳокимияти давлатӣ, доираи васеи аҳли илму фарҳанг, адибону омӯзгорон ва кормандони соҳаи тандурустии ноҳия конференсияи илмӣ-назариявӣ баргузор гардид.

Таъкид шуд, ки донишмандони гузаштаву имрӯзаи тоҷик бо офаридани асарҳои мукаммали илмиву пандуахлоқӣ, ки барои ҷомеаи ҷаҳонӣ аҳамияти бузургу беназир доранд бори дигар шуҳрату нуфузи миллати соҳибтамаддуни тоҷикро дар арсаи байналмилалӣ боз ҳам дучанд сохтанд.

Ҳамзамон, дар идомаи суханронӣ вобаста ба мавзӯи “Абӯалӣ Ибни Сино мутафаккири бузурги Шарқ”, “Аҳамияти ақидаҳои Ибни Сино дар боби илму тарбия” ва дигар ҷанбаҳои илмиву ахлоқии осори ин донишманди миллати тоҷик, ки барои аҳли башар муҷиби пайравию омӯзиш қарор гирифтааст, маърӯзаҳо пешниҳод гардид.

Дар ҷараёни конференсия доир ба ҳадафҳои созандаву сиёсати фарҳангпарваронаи Ҳукумати Ҷумҳурии Тоҷикистон ва заминаҳои рушду такомули илмҳои замони муосир дар кишвар изҳори назар  карда шуд.

Баргузории чунин конфронсҳо барои наслҳои имрӯзу ояндаи кишвар ҷиҳати омӯзиши илмҳои муосир ва ҳифзи фарҳангу тамаддуни аҷдодӣ муҳим ва саривақтӣ арзёбӣ гардид.

А. Ҳасанов