27-уми феврал  бо ташаббуси Мақомоти иҷроияи ҳокимияти давлатии шаҳри Душанбе даври шаҳрии Фестивали “Сад ранги чакан” ва намоишу фурӯши маҳсулоти нақшдӯзиву зардӯзии чаканӣ ташкил ва баргузор гардид.

Қайд гардид, ки бо иқдому ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон номинатсияи «Чакан, ҳунари гӯлдӯзӣ дар Ҷумҳурии Тоҷикистон» дар ҷаласаи 13-уми Кумитаи байниҳукуматӣ оид ба ҳифзи мероси фарҳанги ғайримоддии ЮНЕСКО, ки моҳи декабри соли 2018 дар шаҳри Порт-Луии Ҷумҳурии Маврикий баргузор шуд, ба феҳристи мероси умумиҷаҳонии башарият расман ворид гардида, баргузории фестивал яке аз тадбирҳои гиромидошти ин арзиши асили фарҳангӣ буда, он ба тарғибу ташвиқи либоси миллӣ, баланд бардоштани эътибори нақшу нигор, сӯзанидӯзиву гулдӯзии матоъҳои миллӣ, намоиш додани ҳунари волои тарроҳону ҳунармандони ватанӣ равона гардидааст.

Фистивали мазкур тибқи муқаррароти Низомнома аз рӯи 6 номинатсия сурат гирифа, аз ҳисоби маҳсули дастони ҳунармандон ва тарроҳони шаҳри Душанбе намоиши либосҳои қадимаи чакан, кӯдакона, рӯзмарра, либосҳои маросимӣ ва идона, расмӣ ва намоиши навъҳои сӯзанидӯзӣ роҳандозӣ гардида, манзури меҳмонон ва иштирокчиёни фестивал гардонида шуданд.

Бояд қайд намуд, ки ҳадаф аз баргузории фестивал, ин баланд бардоштани эҳсоси ватандӯстиву хештаншиносӣ, ифтихори миллӣ, арҷ гузоштан ба таъриху тамаддун, фарҳанг, расму оинҳои мардумӣ ва муаррифии санъату ҳунари волои халқи тоҷик дар арсаи байналмилалӣ ба ҳисоб меравад.

Дар фарҷом иштирокчиён аз ҷониби роҳбарияти Мақомоти иҷроияи ҳокимияти давлатии шаҳри Душанбе барои иштироки фаъолона бо Сипоснома, Ифтихорнома ва туҳфаҳои хотиравӣ қадрдонӣ гардиданд.

А. Ҳасанов