Дар шаҳри Кӯлоб даври вилоятии Фестивали ҷумҳуриявии «Сад ранги чакан» бо иштироки   муовини раиси вилояти Хатлон, меҳмонон ва занону бонувони ҳунарманд баргузор гардид.

Дар оғоз   муовини раиси вилояти Хатлон ва меҳмонон намоиши маҳсули дастони занони чирадастро тамошо намуданд.

Дар намоиш ҳунармандон маҳсули ҳунари хеш- гулдӯзиҳои хушдўхту зебо, пироҳан, сӯзанӣ, болишт, даврӣ, ҷойпӯш, бардеворӣ, тоқӣ, гаҳворапӯшак, чойхалта, камарбанд ва даҳҳо номгўи дигари гулдӯзиро пешкаш намуданд. Ҳар як гулдӯзӣ, чакан ва дигар маҳсулоти пешниҳод шуда, бо сеҳру ҷаззобият ва зебогиву пурнақшу нигорӣ диққати сокинону меҳмононро ба худ ҷалб мекард.

Зикр гардид, ки Фестивали «Сад ранги чакан» аз соли 2018 инҷониб бо ташаббуси Ҳукумати Ҷумҳурии Тоҷикистон ва Кумитаи кор бо занон ва оилаи назди Ҳукумати Ҷумҳурии Тоҷикистон баргузор гардида, ба эҳёи ҳунарҳои мардумӣ ва тарғиби либоси миллӣ мусоидат менамояд.

Чакан, ки навъе аз ҳунарҳои мардумии миллати тоҷик мебошад, соли 2018 аз ҷониби ЮНЕСКО ба Рӯйхати мероси фарҳангии ғайримоддии башарият дохил карда шудааст.

Чакан ва чакандӯзӣ таърихи қадимӣ доранд, ки намунаи таърихии чакан дар ҳудуди деҳаи Иттифоқи ноҳияи Фархор ёфт шудааст. Ин кашфиёт собит намуд, ки вилояти Хатлон, минтақаи Кӯлоб диёри чакан аст.

Баргузории чунин чорабиниҳо ба тарғиби либоси миллӣ, эҳёи ҳунарҳои мардумӣ ва баланд бардоштани ҳисси ватандӯстӣ ва зебоипарастии ҷомеа мусоидат мекунад, ки ҳадафи асосии фестивали мазкур ҳамин аст.

А. Ҳасанов