26 март дар театри гимнастикии Мари Белли шаҳри Парижи Фаронса ҳунармандони Театри давлатии академии опера ва балети ба номи С. Айнӣ таҳти унвони «Дивертисмент» барномаи ҳунарӣ пешниҳод намуданд. Дар ин хусус АМИТ «Ховар» бо истинод ба намояндагии доимии Тоҷикистон дар ЮНЕСКО иттилоъ медиҳад.

Ҳунармандони тоҷик дар ин саҳна бо намоиш додани шоҳкориҳои балети тоҷик — «Шопенианаи бузург», «Дон Кихот», «Фаввораи Боғчасарой», «Илҳом аз Осиё» ва «Каприз Паганини» санъати беназири балети тоҷикро дар арсаи байналмилалӣ муаррифӣ намуданд.

Инчунин аз эҷодиёти композиторони классикаи ҷаҳонӣ ва миллӣ, аз ҷумла Сергей Прокофйев, Никколо Паганини, Ҳунарпешаи халқии Тоҷикистон Толибхон Шаҳидӣ ва Далер Тиллоев асарҳо иҷро гардиданд.

АКС: Намояндагии доимии Тоҷикистон дар ЮНЕСКО