Форуми байналмилалии заргарӣ таҳти унвони «Дар саргаҳи хазинаи Амударё» бештар аз 200 ширкат ва бренди заргарӣ, ҳунармандон ва тарроҳони инфиродӣ аз Озарбойҷон, Чин, Русия, Туркманистон, Туркия ва Узбекистон ва чанде аз кшварҳои дигарро дар шаҳри Душанбе ба ҳам овард.

Дар маросими ифтитоҳи форум Муовини якуми Сарвазири Ҷумҳурии Тоҷикистон, инчунин, роҳбарони Мақомоти маҳаллии ҳокимияти давлатӣ, вазорату идораҳои кишварҳои иштирокчии форум, корпуси дипломатӣ, намояндагони созмонҳои байналмилалӣ ва соҳаи маориф иштирок намуданд.

Ҳадафи баргузории форумро баромадкунандагон нақши муҳим гузоштан дар  таҳкими ҳамкорӣ бо шарикони байналмилалӣ дар тамоми силсилаи арзиши ҷаҳонӣ дар бахши заргарӣ, барқарор намудани робитаҳо байни ширкатҳое, ки дар саноати маъдан ва заргарӣ фаъолият мекунанд, инчунин  мусоидат ба рушди устувори онҳо ва баланд бардоштани дониш ва таҷриба, таҳкими иқтидори касбии истеҳсолкунандагони маҳаллии заргарӣ, косибон, ҳунармандони ҷавон ва дизайнерҳо маъниъдод намуданд.

Ҳамчунин, дар чаҳорчӯби ин Форум дар Маркази байналмилалии намоишгоҳҳои Душанбе «Dushanbe Expo Centre” намоишгоҳи маҳсулоти заргарии брендҳои заргарии ватаниву хориҷӣ, созмонҳои ҳунарӣ ва тарроҳони заргарӣ ифтитоҳ ёфт.

Форуми байналмилалии заргарӣ ва Намоишгоҳи Тоҷикистон ба як майдони муассири муколама ва ҳамкориҳои минбаъда байни бозигарони соҳаи саноати кишварҳои хориҷӣ ва маҳаллӣ табдил ёфта, ҳамчунин, барои дарёфти роҳҳои ҳалли татбиқи босамари лоиҳаҳои истеҳсоли маснуоти заргарӣ барои мақсадҳои гуногун мусоидат хоҳад намуд.

А. Ҳасанов