Бо дастгирии Сафорати Ҷумҳурии Тоҷикистон дар Ҷопон хизматчиёни давлатии Тоҷикистон, ки тибқи барномаи “Бурсияҳо барои рушди захираҳои инсонӣ (JDS)” дар Донишгоҳи Ҳирошима таҳсил мекунанд, ҷашни Наврӯзи оламафрӯзро бошукӯҳ таҷлил намуданд.

Дар ин ҷашнвора доираи васеи устодони донишгоҳ ва донишҷуён аз кишварҳои гуногуни дунё (зиёда аз 20 кишвар, аз ҷумла Эрон, Сенегал, Мозамбик, Лаҳистон, Непал, Таиланд, Мянмар, Чин, Кения, Миср, Қирғизистон, Ҷибутӣ, Ҳиндустон, Гана, Гвинея-Бисау, Афғонистон, Индонезия, Уммон, Муғулистон, Покистон, Шри-Ланка ва Ҷопон) ширкат варзиданд.

Тибқи барномаи чорабинӣ ба ҳозирин маълумоти кӯтоҳ дар бораи халқи тоҷик, фарҳанг, забон ва расму оини он, ҳамчунин, рӯнамоии пурмуҳтаво дар бораи ҷашни Наврӯз, таърих ва анъанаҳои наврӯзӣ пешкаш карда шуд.

Дар ин зимн, ишора гардид, ки бо ташаббуси Тоҷикистон ҷашни Наврӯз ба феҳристи мероси фарҳангии ғайримоддии башарият ЮНЕСКО дохил карда шудааст ва ҳамасола ҳамчун ҷашни байналмилалӣ дар аксар гӯшаву канори олам таҷлил карда мешавад.

Дар чорабинӣ, инчунин гӯшаҳои намоишии фарҳангӣ ва наворҳои видеоӣ дар бораи Тоҷикистон, таъриху тамаддун ва дастовардҳои миллии тоҷикон ба тамошо гузошта шуд. Дар охир, меҳмонон аз таъому хӯришҳои болаззати миллӣ ва сурудҳои тоҷикӣ баҳраманд гардиданд.

А. Ҳасанов