Тавре қаблан иттилоъ дода будем, моҳи октябр пойтахти мамлакат, шаҳри  Душанбе мизбони яке аз чорабиниҳои сиёсии муҳими сатҳи баланд – ҷаласаи Шӯрои сарони давлатҳои Иттиҳоди Давлатҳои Мустақил мегардад.

Ҳоло дар пойтахти мамлакат барои баргузории сатҳи баланди ҷаласаи Шӯрои сарони давлатҳои Иттиҳоди Давлатҳои Мустақил омодагӣ мегирад. 

Дар ин замина ҳоло кӯчаю хиёбонҳои пойтахт, хусусан назди бинои Театри давлатии академии опера ва балети ба номи С. Айнӣ, назди даромадгоҳи боғи фарҳангу фароғатии ба номи устод Рӯдакӣ, биноҳои Парлумони Тоҷикистон ва Ҳукумати Ҷумҳурии Тоҷикистон ва дигар биноҳои маъмурӣ ороишоти гулҳо бо тарзи нав ва бо конструксияҳои хос,  оро дода шудаанд.

Ороишот бо конструксияҳои дорои нақшу нигори миллӣ оро дода шуда, инъикосгари  кӯҳҳои сарбаафлоккашидаю пурбарфи Ҷумҳурии Тоҷикистон ва талу тепаҳои гулбадомони мамлакт, ҳамчунин фарҳангу санъати баланди миллати тоҷик мебошанд, ки имрӯз мавриди таваҷҷуҳи махсуси сокинону сайёҳони хориҷӣ гардидаанд.

Гуфтан ба маврид аст, ки шаҳри Душанбеи ҳамешасабз солҳои соҳибистиқлолӣ ба макони баргузории чорабиниҳои сатҳи баланди минтақавию ҷаҳонӣ мубаддал гашта, ба як макони амну босубот ва сайёҳӣ табдил ёфтааст ва ин ифтихори ҳар як фарди худогоҳи тоҷик ба хисоб меравад. 

Аз анҷоми ин ҳама корҳои ободониву созандагӣ дар пойтахти мамлакат метавон гуфт, шаҳри дилорои Душанбе ба мизбонии ҷаласаи Шӯрои сарони давлатҳои Иттиҳоди Давлатҳои Мустақил ва истикболи меҳмонону сайёҳон омода мебошад.

А. Ҳасанов