Бино ба иттилои Раёсати иттилоот ва матбуоти Вазорати корҳои хориҷии Ҷумҳурии Тоҷикистон 620 нафар намояндаи воситаҳои ахбори оммаи дохилию хориҷӣ барои инъикоси ҳамаҷонибаи   Саммити «Осиёи Марказӣ — Русия», ҷаласаи Шурои сарони кишварҳои Иттиҳоди Давлатҳои Мустақил ва ҷаласаи Шурои вазирони корҳои хориҷии Иттиҳоди Давлатҳои Мустақил  сабти ном гардиданд ва барои ҳар як нафар хабарнигорони дохилию хориҷӣ дар Китобхонаи миллии Тоҷикистон маркази матбуотӣ бо тамоми шароити зарурӣ ташкил гардидааст. 

Дар ин маркази матбуотӣ барои хабарнигорон ҷойи кори мувофиқ омода гашта, компютерҳои ба интернети баландсуръат пайваст ташкил шудаанд.

 Тибқи иттилоъ барои инъикоси чорабиниҳои муҳими байналмилалӣ на танҳо хабарнигорон аз кишварҳои Иттиҳоди Давлатҳои Мустақил, балки намояндагони телевизиони «Ал-Ҷазира», агентии «Синхуа» ва чанд нашрияи олмонӣ низ ба қайд гирифта шудаанд ва хабарнигорони хориҷӣ  шароити фароҳамовардашуда дар маркази матбуотиро дар сатҳи баланд баҳогузорӣ карданд.

 Ёдовар мешавем, ки  шуруъ аз 8–ум то 10 октябри соли 2025 дар пойтахти Тоҷикистон — шаҳри Душанбе якчанд чорабинии муҳими сатҳи баланди байналмилалӣ, аз ҷумла сафари давлатии Президенти Федератсияи Русия Владимир Путин ба Ҷумҳурии Тоҷикистон, Саммити роҳбарони давлатҳо дар қолаби «Осиёи Марказӣ – Русия», ҷаласаи Шурои сарони кишварҳои Иттиҳоди Давлатҳои Мустақил ва ҷаласаи Шурои вазирони корҳои хориҷии давлатҳои Иттиҳоди Давлатҳои Мустақил ҷараён мегиранд.
  
  Бо истифода аз шароити мусоиде, ки дар маркази матбуотӣ фароҳам оварда шудааст раванди ин чорабиниҳои сатҳи баланд ба таври васеъ аз ҷониби хабарнигорони дохилу хориҷ  инъикос карда мешаванд.

   А. Ҳасанов