Имрӯз дар Боғи Куруши Кабир «Кӯчаи сайёҳии мавсимӣ» ифтитоҳ мегардад, ки то 11 декабри соли равон амал менамояд. Дар ин хусус ба АМИТ «Ховар» аз шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар доданд.

«Кӯчаи сайёҳии мавсимӣ» ҳамарӯза аз соати 11:00 то 22:00 фаъолият мекунад. Дар он баргузории барномаҳои фарҳангӣ, намоиш ва фурӯши маҳсулоти ҳунарҳои мардумӣ (чӯбкорӣ, заргарӣ, гулдӯзӣ, кулолгарӣ, чакандӯзӣ, қолинбофӣ, наққошӣ, косибӣ ва ғайра), хӯрок ва хӯришҳои лаззиз, шириниҳо ва обҳои ташнагишикани ҷонибҳо, бозиҳои шавқовари варзишию зеҳнӣ, озмуну викторинаҳо, бозиҳои сиркӣ, намоиши театрӣ, гӯшаи аксбардорӣ бо либосҳои миллӣ ва дигар чорабиниҳои фароғатӣ дар назар аст.

Ин иқдом метавонад дар оянда барои ташкили кӯчаи сайёҳии доимамалкунанда дар пойтахти мамлакат заминаи мусоид фароҳам оварад.

Ёдовар мешавем, ки ин иқдом дар доираи баргузории Намоишгоҳи байналмилалии сайёҳии Душанбе – 2025 («Dushanbe International Tourism Exhibition (DITE-2025»)аз ҷониби ширкати «Ҳафт Иқлим Барман»-и Ҷумҳурии Исломии Эрон дар ҳамкорӣ бо ширкати сайёҳии «Саёҳати диёр»-и Ҷумҳурии Тоҷикистон амалӣ мегардад.

АКС: АМИТ «Ховар»