Дар аввали моҳи ноябри соли 2025 Шурои таъсискунандаи Иттиҳоди байналмилалӣ оид ба ҳифзи мерос (ALIPH) 4 лоиҳаи ҳифзи мероси фарҳангӣ дар Ҷумҳурии  Тоҷикистон ва 4 лоиҳаи минтақавӣ оид ба ҳифзи мерос дар Осиёи Марказиро ба маблағи умумии 465,000 доллари ИМА тасдиқ намуд.

Тавре ба АМИТ «Ховар» аз  Сафорати Ҷумҳурии Тоҷикистон дар Конфедератсияи Швейтсария   хабар доданд, Иттиҳоди байналмилалӣ оид ба ҳифзи мерос ҳамчун ташкилоти байналмилалӣ соли 2017 баҳри ҳифз ва барқарорсозии мероси фарҳангӣ ташкил шудааст.   Ҳадафу вазифаҳои фонди мазкур тамоми минтақаҳои дунёро дар бар мегирад, аз ҷумла дар самти ҳифзи пешгирикунанда барои маҳдуд кардани хатарҳои нобудшавӣ, таъмини амнияти мерос, барқарорсозии мероси фарҳангӣ дар минтақаҳои осебпазир ба тағийрёбии иқлим.

Иттиҳоди байналмилалӣ оид ба ҳифзи мерос давоми шаш сол, тақрибан 550 лоиҳаро дар зиёда аз 54 кишвари ҷаҳон ба маблағи 116 миллион доллари ИМА дастгирӣ намуда, ба яке аз фаъолони пешбарандаи ҳифзи мероси ҷаҳонӣ табдил ёфтааст.

АКС: Сафорати Ҷумҳурии Тоҷикистон дар Конфедератсияи Швейтсария