Раиси Маҷлиси Бузурги Миллии Туркия, профессор, доктор Нуман Куртулмуш, ки бо даъвати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар Тоҷикистон қарор дорад, шоми 1 декабр ба шаҳри Ҳисор рафт.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор хабар медиҳад, меҳмононро дар Регистони Қалъаи Ҳисор раиси шаҳри Ҳисор Ҷаббор Носирзода ва президенти Академияи миллии илмҳои Тоҷикистон Қобилҷон Хушвахтзода истиқбол гирифтанд.

Сокинони шаҳри Ҳисор меҳмонони олиқадрро тибқи таомули аҷдодӣ бо нону намак ва таҳти садои карнаю сурнай хуш истиқбол гирифтанд.

Масъулини Мамнуъгоҳи таърихию фарҳангии Ҳисор меҳмононро бо Арк, Қасри Ҳоким, Аскархона, растаи дӯконҳои ҳунарҳои мардумӣ, Осорхонаи таърихии мамнуъгоҳ ва таърихи гузаштаю имрӯзаи Ҳисори бостонӣ шинос намуданд.

АКС: Мақомоти иҷроияи ҳокимияти давлатии шаҳри Ҳисор