Дар доираи амлигардонии «Барномаи давлатӣ оид ба кабудизоркунии Ҷумҳурии Тоҷикистон барои давраи то соли 2040» бо ибтикори Сарраёсати ҳифзи муҳити зист дар вилояти Хатлон дар ҳудуди  ноҳияи Хуросон маъракаи ниҳолшинонӣ баргузор гардид, ки дар он   масъулини сохторҳои дахлдор, фаъолон ва сокинони маҳаллӣ иштирок намуданд.

Тибқи иттилоъ ин навбат дар маъракаи сабзгардонӣ  1500 ниҳоли сояафкану ҳамешасабз шинонида шуд, ки ба гуфтаи мутахассисон ниҳолҳои шинонидашуда на танҳо ба ободии муҳит ва беҳбудии манзараи канори роҳ мусоидат мекунад, балки дар коҳиш додани таъсири эрозияи хок, тоза нигоҳ доштани ҳаво ва таъмини муҳити солим низ нақши муҳим дорад.

Ёдовар бояд шуд, ки дар ин рӯз  дар доираи амлигардонии «Барномаи давлатӣ оид ба кабудизоркунии Ҷумҳурии Тоҷикистон барои давраи то соли 2040» дар ҳама шаҳру навоҳии вилояти Хатлон корҳои сабзу хуррамгардонӣ бо вусъат ҷараён дорад.

Бояд гуфт, ки «Барномаи давлатӣ оид ба кабудизоркунии Ҷумҳурии Тоҷикистон барои давраи то соли 2040»   бо мақсади беҳдошти вазъи экологии ҷумҳурӣ, пешгирии таъсири номатлуби тағйирёбии иқлим ва муҳайё намудани шароити мусоиди зисти аҳолӣ аз ҷониби Ҳукумати мамлакат таҳия гардидааст, ки амалӣ намудани чорабиниҳои мушаххаси барнома ба сабзу хуррамгардонии ҳудуди мамлакат, шинонидан ва парвариши дарахту буттаҳо дар ҳудуди ҳар як маҳаллаю ҷамоат, идораҳои маъмурӣ, талу теппаҳо,  шафати шоҳроҳҳо, роҳҳо, соҳили дарёҳо ва қад-қади ҷуйборҳо равона гардидааст.

Дар маҷмӯъ, маъракаи сабзкорӣ дар талу теппаҳо ва канори шоҳроҳҳо дар ҳудуди вилояти Хатлон иқдоми муҳим барои ҳифзи муҳити зист ва рушди устувори экологӣ мебошад. Бо шинонидани бештари дарахтон ва идомаи чунин тадбирҳо метавон  муҳити худро тоза ва табиати худро сабзу зебо нигоҳ дошт.

А. Ҳасанов