Бо ташаббуси  Институти фалсафа, сиёсатшиносӣ ва ҳуқуқии Академияи миллии илмҳои Тоҷикистон ҷиҳати шинохти мутафаккири барҷаста, файласуф, олим, табиби оламшумул, фарзанди фарзонаи халқи тоҷик Абуалӣ ибни  Сино таҳти унвони “Аҳамияти синошиносӣ ва муаррифии “Осор”- и Абӯалӣ ибни Сино” ҳамоиш баргузор гардид.

Дар ҳамоиш  доир ба осори гаронарзиши Абуалӣ ибни Сино сухан гуфта шуда, таъкид гардид, ки Шайхураис Абӯалӣ ибни Сино аз мутафаккирони барҷастаи тоҷик буда, бо донишу ҷаҳонбинии фарогираш дар олами тибби ҷаҳон саҳми арзишманд гузошта, дар ҷаҳон аз пурмаҳсултарин олимон ва адибон эътироф гаштааст.

Фаъалияти эҷодии Сино аз 17- 18 солагиаш дар солҳои 996-997 шуруъ шуда, расо 40 сол давом кардаст. Ӯ осори насрию назмиашро ҳам ба забони тоҷикӣ ва ҳам арабӣ эҷод кардааст.  

Таъкид шуд, ки осору афкори Абуалӣ ибни Сино то имруз на танҳо аҳамияти илмиро гум накардааст, балки бо мурури замон боз ҳам муҳимтар арзёбӣ мешаванд. Хосса, осори бо забони тоҷикӣ навиштаи ӯ дар рушди забони фалсафӣ ва илмии тоҷик нақши намоён дорад.

Ёдовар бояд шуд, ки Маркази “Синошиносӣ” то ҳол 8 ҷилди осори Абуалӣ ибни Синоро ба забонҳои тоҷикӣ ва русӣ ба табъ расонида, ҷилди нуҳуми он дар арафаи нашр қарор дошта, инчунин ҷилдҳои 12 то 16 пурра ба забонҳои тоҷикӣ ва русӣ тарҷума ва нашр шудаанд. 

А. Ҳасанов