Субҳи содиқи  21 март, дар Муассисаи Давлатии боғи  “Ғалаба” ва “Нигаҳдории ҷангал”-и шаҳри Душанбе бо ибтикори Мақомоти иҷроияи ҳокимияти давлатии шаҳри Душанбе  бо пос доштани расму оинҳои миллӣ, аз ҷумла пухтани суманак, тайёр кардани ҳар гуна таомҳои баҳорӣ, оростани гулхани ҷашнӣ ва баргузории дигар суннатҳо фарорасии ҷашни Наврӯзи хуҷастапайро пешвоз гирифтанд.

Ёдовар бояд шуд, ки бо ибтикори Пешвои миллат муҳтарам Эмомалӣ Раҳмон ҷашни Наврӯз мақоми байналмилаиро соҳиб гашта, дар кишварҳои ҳавзаи наврӯз ин ҷашни бостонии тоҷикон дар сатҳи баланд таҷлил мешавад.

Ҷаҳонишавии Наврӯз имкон фароҳам сохт, ки сайёҳони хориҷӣ ҷиҳати шиносоии расму оини баргузории Наврӯз ба Тоҷикистон мароқ зоҳир намоянд ва имрӯзҳо, махсусан, дар арафаи ҷашни Наврӯз сайёҳони зиёде дар мамлакат қарор доранду дар чорабиниҳои Наврӯзӣ иштирок ва аз таҷлилу баргузории сатҳи баланди наврӯз дар Тоҷикистон дар ҳайратанд.

Пас аз анҷоми барномаи фарҳангӣ расо соати 06:00  Корвони Наврӯзӣ   дар иҳотаи карнайнавозону таблнавозон бо рӯҳияи баланди саршори шукргузорӣ аз сарзамини шукуфону гулфишони Тоҷикистон бо иштироки Бобои деҳқон ва Маликаи баҳор  оғоз аз Боғи ғалабаи пойтахт дар кӯчаву хиёбонҳо ба сокинону меҳмонон муждаи  фарорасии Соли нави аҷдодӣ – Наврӯзи оламафрӯзро расониданд.

А. Ҳасанов