Дар доираи тантанаҳои ҷашни Наврӯзи байналмилалӣ субҳи рӯзи 21 –уми март бо ибтикори МИҲД-и вилояти Хатлон корвони Наврӯзӣ ташкил гардид, ки дар он занону модарони фаъол ва ҷавондухтарон иштирок намуда, Наврӯзи оламафрӯзро бо назардошти расму оини мардумӣ бо шукӯҳу шаҳомати хоса таҷлил карданд.

Корвони наврӯзии шаҳр бо рамзҳои наврӯзии Маликаи баҳор дар иҳотаи карнайнавозону таблнавозон бо рӯҳияи баланди саршори шукгузорӣ аз сарзамини шукуфону гулфишони Тоҷикистон аз чор самт  вориди базмгоҳҳои наврӯзӣ гардида, ба сокинону меҳмонон аз фарорасии Соли нави аҷдодӣ хабар медоданд.

Дар ин рӯз роҳбарияти мақомоти иҷроияи ҳокимияти давлатии  вилояти Хатлон, намояндаи Ҳукумати Ҷумҳурии Тоҷкистон, ҳамчунин меҳмонон аз Ҷумҳурии дусту бародар, Узбекистон ва дигар роҳбарону фаъолон аз намоишгоҳи ҳунарҳои мардумӣ, маҳсули дастранҷи кишоварзону дастоварду комёбиҳои идораву ташкилотҳо ва расму анъанаҳои наврӯзии мардумони гуногунмиллати вилояти Хатлон дидан намуда, бо ҳунармандону собиқадорони меҳнат, иштирокдорони чорабинии наврӯзӣ сӯҳбатҳо намуда, аз таърихи Наврӯзи хуҷастапай ва саҳми он дар тамаддуни башарият ёдоварӣ карданд. Чун суннату оини Наврӯзӣ ҳар як гуша барои намоиши расму фазилати наврӯз бо инобати анъанаҳои қадимаву имрӯзаи истиқболи наврӯзи озода ороста шуда буд.

Дар намоиши оинҳои писандидаи сокинон, ҷолибтарин русуми ниёгон, аз оростани хони таърихии “ҳафтсин”-у “ҳафтшин”, то таҳияи хурокҳои миллӣ, ғизоҳои марбути айёми наврӯзӣ, намунаи ҳунарҳои  халқӣ, аз қабили гулдӯзиву қолинбофӣ, адрасу атласбофӣ, кандакорӣ, маснуоти заргарӣ ва  дигар ҳунарҳои мардумӣ пешкаши ҳайати меҳмонон гардонида шуд, ки аз завқи баланди сокинони сарафрози  вилоят шаҳодат медиҳад.

Дар маросими расмӣ бахшида ба ҷашни наврӯзи байналмилалӣ раиси вилояти Хатлон зикр дошт, ки ин иди аҷдодӣ бо шарофати озодиву соҳибистиқлолии Ватани маҳбубамон на танҳо ба мақоми расмӣ соҳиб гардид, балки бо талошҳои Асосгузори сулҳу ваҳдати миллӣ – Пешвои миллат   муҳтарам Эмомалӣ Раҳмон ба ҳайси ҷашни эҳёи табиату зебоӣ мақоми байналмилалӣ касб кард ва имрӯз он дар саросари олам таҷлил карда мешавад.

Дар рафти тантанаҳои Наврӯзӣ аз тарафи ҳунармандони вилояти Хатлон барномаи театрикунонидашудаи консертӣ, бо тартиб ва расму оийни тоҷикона пешниҳод карда шуд, ки ҳар як суруд ва мусиқии он тараннумгари фасли зебои сол – баҳор, Ватан, Наврӯз, Истиқлолият, ободӣ ва пешрафти ватан буд, замзамаҳои нек бо сурудҳои дилчасп ба чорабинии хусусияти фароғатиро зам намуд.

А. Ҳасанов