Мардуми саодатманди ВМКБ тантанаи ин ид зебои баҳор – Нарвӯзи хуҷастапайро бо шодмониву  фараҳмандии беандоза  таҷлил  намуда, бо риояи суннатҳои неки Наврӯзӣ расму оини ин ҷашни мардумӣ ва вижагиҳои хосаи таҷлили он, дар боғи фарҳангӣ-фароғатии шаҳри Хоруғ ба ҳам омаданд. 

Роҳбари  вилоят ва  ҳайати  расмӣ аз намоишгоҳи идонаи  ҳунармандони соҳибфарҳанги Боми ҷаҳон  дидан намуда, ба маҳорати баланди ҳунармандону  масъулини Наврӯзгоҳ ҷиҳати пешниҳоди сунантҳои сирф мардумии Наврӯзи Бадахшон  ва гирдоварии дастранҷи хоҷагиҳои деҳқононии шаҳру ноҳияҳои  вилоят  баҳои баланд доданд.

Баъди тамошои намошгоҳ роҳбарияти  ВМКБ  зимни суханронӣ иброз дошт, ки  халқи шарафманду фарҳангдӯсти  тоҷик, хусусан бошандагони  Боми ҷаҳон  имсол  чун ҳарсола Наврӯзи байналмилалиро дар рӯҳияи  баланди бунёдкориву созандагӣ, ифтихор аз давлату давлатдорӣ  бо тантана ва риояи вижагиҳои хос қайд менамоянд. 

Гуфта шуд, ки ҷашни  Наврӯз дар ҳакикат аз зумраи муҳимтарин ва муқаддастарин  оинҳои миллии мардуми тоҷик  буда, тамоми шукӯҳу азамат ва таъриху тамаддуни куҳани миллати тоҷикро  дар худ  таҷассум менамояд. 

Базми Наврӯзии бошандагони ВМКБ бо ҳунарнамоии аҳли санъату фарҳангиии вилоят басо ҷолибу диданӣ гардид. Ҳунармандони вилоят дар ин рӯз беҳтарин суруду таронаҳои наврӯзии худро пешниҳоди сокинону меҳмонон гардониданд, ки таранумкунандаи Наврӯзи ҷаҳонӣ ва баҳори нозанин дар маркази  ВМКБ шаҳри Хоруғ  буд.

А. Ҳасанов