Ҳамасола дар арафаи ҷашни Наврӯзи байналмилалӣ  бо дастгирии Мақомоти иҷроияи ҳокимияти давлатии шаҳри Душанбе мусобиқаи пойгаи аспдавонӣ баргузор мегардад. Имсол низ ин чорабинии варзишӣ дар “Наврӯзгоҳ” – и пойтахт бо иштироки сокинону меҳмонон аз хориҷи мамлакат дар сатҳи баланд ташкилу баргузор шуд.

Дар мусобиқаи мазкур варзишгарони беҳтарини Тоҷикистон ва ҳамсоякишварҳо- Узбекистону Қирғизистон иштирок намуданд.

Мусобиқа дар ҳамкорӣ бо Федератсияи “Пойга ва бузкашӣ”-и Тоҷикистон ба роҳ монда шуда,  мақсад аз баргузор намудани чорабинии мазкур пеш аз ҳама тарғибу ташвиқи тарзи ҳаёти солим, ҷалби ҳарчи бештари аҳолӣ ба намудҳои миллии варзиш хусусан, пойгаи аспдавонӣ ва дар сатҳи баланд таҷлил намудани ҷашни байналмилалии Наврӯз мебошад.

Бояд гуфт, ки дар муқосиа ба солҳои қаблӣ дар арафаи таҷлил аз ҷашни байнлалмилалии Наврӯз соли ҷорӣ аз Тоҷикистони азиз шумораи зиёди сайёҳони хориҷӣ дидан карданд. Миёни гардишгарон фаъолони шабакаҳои иҷтимоии кишварҳои аврупоӣ, ки дар сомонаҳои иҷтимоӣ зиёда аз 2 -миллион пайгир ё худ обуначӣ доранд, иштирок доштанд ва бо мақсади муаррифии фарҳанги тоҷикистон ба ҷаҳон раванди чорабиниро мустакиман дар сомонаҳои худ пахш мекарданд.

Ёдовар бояд шуд, ки мусобиқаи пойгаи аспдавонӣ байни аспҳои зоти тоҷикӣ, англисӣ ва ахалтекинии синну солашон аз 2 то 4 сола дар масофаҳои 1000, 1200, 1400, 1800 ва 2400 метр баргузор гардида, ғолибонии мақоми аввал ба маблаги  10000 сомонӣ, ҷойи дуюм ба 7000 сомонӣ ва зинаи сеюм ба маблаги 5000 сомонӣ, инчунин диплом, медал ва ҷом қадрдонӣ карда шуданд.

А. Ҳасанов