Форуми Соли байналмилалии ҳифзи пиряхҳо дар доиари «Даҳсолаи амал барои илмҳои криосфера, солҳои 2025-2034» аз ҳамоиши дигарест, ки дар чаҳорчӯби чорабиниҳои Конфронси байналмилалии сатҳи баланд оид ба ҳифзи пиряхҳо баргузор гардид.

Дар кори форум намояндагон Ҳукумати Ҷумҳурии Тоҷикистон, коршиносон аз созмонҳои байналмилалию минтақавӣ ва ҷумҳурии Фаронса иштирок намуданд.

Баромадкунандагон ҳадафи форумро баланд бардоштани сатҳи огоҳии глобалӣ дар бораи нақши муҳими пиряхҳо, барф ва ях дар системаи иқлим, тағйир додани сиёсат ва чораҳои устувор оид ба ҳифзи пиряхҳо арзёбӣ намуданд.

Маврид ба зикр аст, ки 13 августи соли 2024, зимни баргузории Иҷлосияи 78-уми Маҷмаи Умумии Созмони Милали Муттаҳид қатъномаи наве таҳти унвони «Даҳсолаи амал барои илмҳои криосфера, солҳои 2025-2034» қабул гардид. Ин даҳсола ташаббуси 6-уми ҷаҳонии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, аз ҷониби Ҷумҳурии Тоҷикистон ва дар ҳамкорӣ бо Ҷумҳурии Фаронса пешбарӣ гардидааст. Қабули чунин ташаббуси муҳим дар шароити ҳозираи тағйирёбии иқлим, ки таъсири аз ҳама бештари он ба пиряхҳо мерасад, муҳим ва саривақтӣ буда, ҷомеаи ҷаҳонро ба пажуҳиши амиқи илмии пиряхҳо даъват менамояд.